المهم أن زميلتى جابتلى ظرف وقالتلى يا حسن عاوزاك تحطلى الظرف ده فى السيد البدوى لما تسافر طنطا ...
قلتلها : بس كده يا ست الكل أنت تؤمرى ولو عاوزه اجيبلك السيد البدوى بنفسه اجيبهولك ...
فضحكت وقالتلى : يا حسن بطل شغل الاونطا بتاع الطنطاوية ده ...
فأخذت منها الظرف وكنت قاعد أنا وزمايلى الانتيم في الشغل أو كما كانوا يطلقون علينا " شلة الأنس " وهى فى الحقيقة شلة أبالسة وكان يوم خميس وهو اليوم إللى كنت برجع فيه طنطا علشان أقضي فيه إجازتي الأسبوعية جمعة وسبت ...
المهم خدت منها الظرف وطبعا فتحته أنا وشلة الأنس " محمد ومحمد وممدوح وايهاب " فلاقينا الظرف فيه 100 جنية ...
وطبعا زملائى من شياطين الإنس قالولي هتعمل إيه بال 100 جنية يا سونسون ...؟!!!
قلتلهم : هعمل إللى فى دماغكم طبعا يا أساتذة إبليس يا إللى الشيطان الرجيم جنبكم ملاك برىء ... وطلبنا سندوتشات جمبرى و حاجة ساقعة من أشهر محل جمبرى فى شيراتون وأكلنا وشربنا ب ال 100 جنية قبل ما أروح ...
المهم وأنا مروح قابلتنى زميلتى وكانت سكرتيرة رئيس مجلس الإدارة وقالتلى ما تنساش يا حسن تحط الظرف في السيد البدوى ...
فقلت لها : يا ست الكل حطى فى بطنك بطيخة صيفى وأعتبرى الفلوس وصلت السيد البدوى خلاص وأعتبرى العريس جه كمان ...
فضحكت وقالتلى : صدق من قال عليكم طنطا بلد الاونطا ...
المهم روحت طنطا ورجعت يوم الحد الشغل ... ولسه بقعد على مكتبى لقيت زميلتى داخله عليا المكتب ...
قلت لنفسي بس : جالك الموت يا تارك الصلاة ... أكيد واحد من ولاد الابالسة زمايلى قالها أن إحنا أكلنا بفلوسها جمبرى ...
ولسه بقولها أنا كنت هقولك الحقيقة .....
لقيتها بتقولى : أنا مش عارفه اشكرك ازاى يا حسن ... أنت فعلا أخ وصديق نادر وربنا وحده يعلم معزتك وغلاوتك عندى أنا متشكرة أوى على إللى أنت عملته وأنك حطيت الفلوس في السيد البدوى ...
وقبل ما أفوق من الصدمة والدهشة والاندهاش ...
لقيتها بتقولى : أنا أتقدم لى عريس امبارح مهندس عايش في أمريكا وهنتجوز آخر الشهر وهسافر معاه كمان ...وأنت طبعا أول واحد معزوم في الفرح أنت وشلة الأنس بتاعتك ...
المهم وإحنا في الفرح وزميلتى قاعده في الكوشة جنب عريسها سلمت عليها وباركتلها وقلت لها : على فكرة أنا محطتش ال 100 جنية فى السيد البدوى أحنا اشترينا بيها سندوتشات جمبرى و أكلناها أنا وشلة الأنس ودعينالك علشان كده ربنا جابلك العريس اللى أنتى كنت عايزاه ...
ضحكت ومصدقتنيش ...!!!
0 التعليقات:
إرسال تعليق